निरज रानाभाट 

भरतपुर, चितवन । असार ८ गते चितवनमा हुने ‘एन प्लस प्रोफेसनल लक्की फिल्मी अवार्ड – २०८० ’ को अडियो जिंगल सार्वजनिक भएको छ । चर्चित नायक अनुप विक्रम शाही, नायिका प्रियंका कार्की र लक्की मिडिया हाउस चितवनका महा – प्रबन्धक हरि कार्की ‘ लक्की ’ ले संयुक्त रुपमा अडियो जिंगल सार्वजनिक गरेका हुन् । नायक अनुप विक्रम शाहीले फिल्मी अवार्डले कलाकारहरुलाई हौसला मिल्ने बताए । नायिका प्रियंका कार्कीले फिल्मी अवार्ड कलाकारहरुका लागि उत्सव भएको बताइन् । चलचित्र उद्योगको प्रर्वद्धन र प्रोत्साहन, कलाकारलाई हौसला र सम्मान गर्ने लक्ष्य सहित चितवनमा फिल्मी अवार्ड कार्यक्रम हुन लागेको हो ।

अडियो जिंगलमा गायक आनन्द कार्की र गायिका सरिता शाहीको स्वर रहेको छ । हरि कार्की ‘ लक्की ’ को शब्द, राजु सिंहको संगीत, मनोहर सुनाम म्युजिक एरेन्जर, भोला पौडेल रेकर्डिङ / मिक्स – मास्टर रहेका छन् । साउन्ड रेकर्डिङ स्टुडियोमा जिंगल रेकर्ड गरिएको हो । फिल्मी अवार्डमा देशभरबाट सिनेकर्मी, कलाकारहरु सहभागी हुनेछन् । फिल्मी अवार्ड कार्यक्रम चितवनको लेक ट्वान्टी थाउजेण्ड फार्म एण्ड रिट्रिटमा हुने छ । लक्की मिडियाका महा – प्रबन्धक कार्कीले देशव्यापी प्रचारप्रसार कार्य जारी रहेको बताए । अवार्ड वितरणका लागि जुरी टिम समेत निर्माण भैसकेको बताए । उनका अनुसार सिने क्षेत्रका २ दर्जन बढी विधामा अवार्डहरु वितरण हुने छन् ।